Hozte-sistema Raspberry Pi 4 batean #remake

Ziur txoratzen zaudela Raspberry Pi-ari ateratzen diozun etekinarekin. Datuak gordetzeko laino bat izango duzu martxan agian, Retrogaming makina bat edo adimendun telebista bat beharbada. Jarri al diozu arretarik bere osasunari ordea? Raspberry Pi 4-ak hobekuntza nabarmenak ekarri ditu aurreko Pi 3 bertsioarekin alderatuta, RAM gehiago eta prozesatzaile bizkorragoa, besteak beste. Hain zuzen ere azken honek, Broadcom BCM2711 prozesatzaileak tenperatura altuak hartu ohi ditu lan-karga gogorretan.

bcm2711

Raspberry Pi 4B-an aurkitzen den Broadcom BCM2711 prozesatzaileak, 1,5GHz-tako 4 nukleodun PUZ-a eta Broadcom VideoCore VI GPU-a ditu egitura fisiko berean. 🔗

Dokumentazioaren arabera, Raspberry Pi 4B modeloak PUZ-aren tenperatura zaintzen du, 85ºC-tako muga igaro ez dezan abiadura eta tentsioa txikiagotuz. Hala eta guztiz ere, gure aldetik prozesatzailearen laneko tenperaturak 50ºC-tako muga gainditu ez dezan kontrolatzea erabaki egokia izango da errendimentuaren eta biziraupenaren ikuspegitik. Horretarako aparteko hozte-sistema bat gehitu diezaiokegu gure mikro-ordenagailuari. Ariketa honetan GPIO pin edo orratzak erabiliz haizemaile bat instalatuko dugu.

vcgencmd

Prozesatzailearen tenperatura eskuratzeko vcgencmd komandoa erabiliko dugu. Hau Raspberry Pi gailuko VideoCore GPU-aren inguruko hainbat informazio eskuratzeko komando-lerrorako tresna da. Tresna honen instalakuntzaz ez dago arduratu beharrik, Raspberry OS sistema eragilean etorri ohi da berez, hala eta guztiz ere ondorengo estekan ikus daitezke python pakete hau instalatzeko eman beharreko urratsak 🔗.

Beraz, tenperatura eskuratzeko ondoko agindua sar dezakegu komando-lerroan:

vcgencmd measure_temp

gpio

Erabilera orokorreko sarrera edo irteera digital gisa erabil daitezkeen pin edo orratzei deitzen zaie GPIO, inglesez general-purpose input output. Orratz hauek zirkuitu integratuetan edo plaka elektronikoetan aurki daitezke, adibidez Raspberry Pi eta antzeko single-board computer (SBC) gailuetan. Pin hauek nahieran erabil daitezke norberak bere beharretara egokituz, ariketa honetako kasuan egingo dugun moduan.

5Vdc tentsioan lan egiten duen haizemaile bat prozesatzailean fisikoki muntatu ostean konexio elektrikoa GPIO pin-etan egingo dugu. Zirkuitoan NPN transistore batek switch edo etengailu lanak egingo ditu.

Zirkuitoaren eskemak, moldaketa desberdinak eta gainerako fitxategiak git biltegian daude eskuragarri 🔗

kontrola

Python-en idatzitako script 🔗 baten laguntzaz haizemailea kontrolatuko dugu, prozesatzailea 40ºC eta 50ºC arteko tenperatura tartean mantentzeko helburuarekin martxan jarri edo geldiaraziz. Fitxategia eskuratu ostean exekuzio baimena eman behar zaio:

sudo chmod +x fan_control

Jarraian, funtzionatzen duela egiaztatzeko komando lerroan exekutatu:

./fan_control

Haizemailearen kontrola Raspberry Pi-aren abioan lanean has dadin ondorengo systemd zerbitzu fitxategia sortu:

sudo nano /etc/systemd/system/fan_control.service

Bertan haizemailea kontrolatzen duen script-a exekutatzeko zehaztu:

[Unit]
Description=Haizemailearen kontrol zerbitzua
After=sysinit.target

[Service]
ExecStart=/script-aren/kokapena/fan_control
Restart=always
RestartSec=10
WorkingDirectory=/script-aren/kokapena
StandardOutput=/var/log/syslog
StandardError=/var/log/syslog

[Install]
WantedBy=sysinit.target

Amaitzeko sortu berri dugun zerbitzua gaitu:

sudo systemctl enable fan_control

Zaindu maite duzun hori!!

Iturriak: vcgencmd, BCM2711, howchoo, VideoCore, BCM2711 datasheet, RPI4 datasheet, transistorea